«Գեոինֆո» ՍՊԸ գիտա-կիրառական կենտրոնի կողմից 2016թ. մարտի 31-ին Երևանում՝ Համահայկական բնապահպանական ճակատի գրասենյակում, կազմակերպվեց «Հայաստանի անտառների հասարակական մոնիտորինգ»-ի հերթական դասընթացը հետևյալ թեմաներով.
- Անտառի ապօրինի գործողությունները և անտառային օրենսդրությունը,
-GPS նավիգացիոն համակարգի ուսուցում` անտառում և տեղանքում կողմնորոշում, բացահայտված ապօրինության գրանցում, տվյալների հավաքագրում և փոխանցում:
Հայաստանի անտառների հասարակական մոնիտորինգի ծրագրի երկրորդ փուլը իրականացվում է ENPI FLEG II («Եվրոպական հարևանության քաղաքականության արևելյան երկրների և Ռուսաստանի անտառային օրենսդրության կիրարկման և կառավարման բարելավում») ծրագրի շրջանակներում:
Դասընթացին ներկա էր 17 մասնակից, այդ թվում՝ բնապահպանական ՀԿ ներկայացուցիչներ, ակտիվիստներ, անտառագետներ, աշխարհագրագետներ, լրագրողներ և ուսանողներ:
Դասընթացի ընթացքում քննարկվեցին հետևյալ հիմնահարցերը`
Անտառային օրենսդրություն, ապօրինի գործողություններ, անտառային տարածքների մոնիտորինգ, արբանյակային պատկերների վերծանում, անտառում բացահայտված ապօրինության գրանցում, GPS նավիգացիոն համակարգի կիրառում, ինտերակտիվ քարտեզների օգտագործում, տվյալների հավաքագրում և փոխանցում:
Մասնակիցները նաև դիտեցին 3 ֆիլմ ՀՀ անտառկազմող տեսակների, խնամքի և սանիտարական հատումների իրականացման վերաբերյալ, որոնք պատրաստվել են Հայաստանի անտառների հասարակական մոնիտորինգ ծրագրի շրջանակում:
Կամավորները, ովքեր Հայաստանի անտառների հասարակական մոնիտորինգի շրջանակներում արդեն իրականացրել են մի շարք դաշտային ուսումնասիրություններ, ներկայացրին իրենց ունեցած հաջող փորձը և նոր մասնակիցներին հորդորեցին միանալ դաշտային մոնիտորինգի իրականացման աշխատանքներին: Դաշտային ուսումնասիրությունները ավելի արդյունավետ դարձնելու և գործնականում գիտելիքները ճիշտ կիրառելու նպատակով կամավորները առաջարկեցին նաև գործնական դասընթացներ կազմակերպել դաշտային պայմաններում:
|
|
|
|
